سياسة الخصوصية لتطبيق وِصال
آخر تحديث: 17 تشرين الثاني 2026
وِصال تطبيق للأزواج: أسئلة وألعاب ومساحة مشتركة بين شريكين. بنعرف إنه اللي بتكتبوه فيه خاص جداً، فبنينا التطبيق على قاعدة بسيطة: اللي بتكتبه لشريكك، لشريكك بس. هالصفحة بتشرح بوضوح شو بنجمع، وليش، ومين بيشوفه، وكيف تمسحه.
1. مين إحنا
التطبيق بيديره محمد شحادة، من عمّان، الأردن. لأي سؤال عن خصوصيتك: support@getwessal.com.
2. شو بنجمع
حسابك
- الإيميل، أو الحساب اللي دخلت فيه من Apple أو Google (بناخد منهم الإيميل والاسم بس). إذا اخترت "إخفاء الإيميل" مع Apple، بيوصلنا إيميل وسيط من Apple.
- كلمة السر، إذا سجّلت بالإيميل. ما بنخزّنها نفسها، بنخزّن بصمة مشفّرة منها.
- اسمك وجنسك وبلدك. الجنس مهم لأنه التطبيق بيخاطبك ويخاطب شريكك بالمذكر أو المؤنث. وبلد اللي بعت الدعوة بيحدد لهجة الأسئلة اللي بتطلعلكم.
- منطقتك الزمنية ولغة التطبيق ووقت التذكير اليومي اللي بتختاره.
- نوع جهازك (iPhone أو أندرويد)، ووصف قصير للجهاز والمتصفح لكل جلسة دخول، عشان نقدر نطلّعك من الأجهزة التانية.
اللي بتعملوه سوا
- أجوبتكم على الأسئلة والألعاب، ودفتركم، ومحطات ولحظات قصتكم، ومواعيدكم، وتواريخكم المهمة (متل الخطبة والعرس).
- مودك، وآخر رسالة سريعة بعتها (ما بنخزّن سجل محادثة، بس آخر رسالة)، واللقطات (صورة أو رسمة).
- الصور اللي بتضيفها لقصتكم أو للبازل أو للقطات. التطبيق بيشيل منها كل المعلومات المخفية (متل مكان التصوير ونوع الكاميرا) قبل ما ترفع.
- وِردكم: ختمتكم، ووين وصل كل واحد، ووقت التذكير، و"دعيتلك" (مين دعا لمين وبأي يوم، بدون نص).
- قسم "Hot" (للمتزوجين بس): اختياراتكم بالألعاب وكوبوناتكم. هالقسم ما بيطلع منه إشعارات ولا ويدجتس.
موقعك (إذا شغّلت "المسافة" بس)
- التطبيق بيطلب موقعك التقريبي، وبس وهو مفتوح، ولا مرة بالخلفية.
- قبل ما نخزّنه، السيرفر بيقرّبه لحوالي كيلومتر، وبنخزّن آخر موقع بس، بدون سجل.
- شريكك بيشوف المسافة بالكيلومتر بس، ولا مرة مكانك.
- لما تطفي "المسافة" بينمسح موقعك فوراً.
اشتراك وِصال+ (إذا اشتركت أو جرّبت)
- لما تشتري من Apple أو Google، بيوصلنا منهم: رقم الشراء، والمنتج (شهري أو سنوي أو مدى الحياة)، وتواريخ البداية والانتهاء، وحالة الاشتراك (فعّال أو منتهي أو مسترجع)، وهل بيتجدد لحاله، وبلد حساب المتجر. وإشعارات Apple بتجيب معها كمان السعر والعملة. إشعارات Google ما فيها غير رموز، وحالة الاشتراك بنرجع نسألها من Google. ما بنشوف بياناتك البنكية ولا بطاقتك أبداً. المتجر هو اللي بيقبض.
- بنربط الشراء بحسابك برقم داخلي خاص بحسابك، مش بإيميلك. وبنسجّل أي عرض داخل التطبيق كان شغّال على هالمنتج وقت ما اشتريت (مش إذا استخدمته)، عشان نعدّ نتايج العروض.
- التجربة المجانية من عنا مش من المتجر: ما بتحتاج بطاقة، وبنسجّل بس إنها بلّشت ومدتها.
الإشعارات
- رمز الإشعارات تبع جهازك، عشان نبعتلك إشعارات، وسجل بالإشعارات اللي انبعتت (نوعها ووقتها).
الأيام اللي استعملت فيها التطبيق
- الأيام اللي فتحت فيها التطبيق وأي أقسام فتحت، بدون أي محتوى، عشان نعرف شو بينحب ونحسّنه. بنحتفظ فيها 13 شهر.
- رقم نسخة التطبيق اللي عندك ونوع جهازك (آيفون أو أندرويد)، عشان نعرف كم واحد حدّث ونقرر إمتى نوقف النسخ القديمة. بنحفظ آخر رقم بس، وبينمسح مع حسابك.
- رابط دعوتك: أول مرة بيفتحه تطبيق محادثة (متل واتساب، لما يجيب معاينة الرابط) وأي تطبيق كان، وأول مرة بيفتحه حدا من متصفح ونوع جهازه (آيفون أو أندرويد أو غيره)، عشان نعرف إذا الدعوات بتوصل. ما بنحفظ عنوان الـ IP ولا أي إشي تاني عن اللي فتحه، وبينمسح مع حسابك.
رسايلك إلنا (إذا بعتلنا)
- إذا بعتلنا رسالة من "تواصل معنا": نوعها (اقتراح أو مشكلة أو سؤال) ونصها، ونسخة التطبيق ونوع جهازك، عشان نفهم المشكلة. بتنحفظ مع حسابك عشان نرد عليك على إيميلك.
عنوان الـ IP
- بنستعمله عشان نحمي من محاولات الدخول المتكررة، وسجلات السيرفر بتحتفظ فيه 14 يوم بالكتير لأغراض الأمان. ما بنخزّنه مع حسابك.
3. شو ما بنجمع
- ما في بالتطبيق أي أداة إعلانات ولا تتبّع ولا تحليلات من طرف تالت.
- ما بنوصل للكاميرا ولا المايكروفون ولا جهات الاتصال.
- ما بناخد موقعك الدقيق، ولا موقعك بالخلفية.
- ما بنطلب تاريخ ميلادك.
- ما بنخزّن بياناتك البنكية ولا رقم بطاقتك. الدفع بيصير عند Apple أو Google، وما بيوصلنا منه إلا اللي ذكرناه فوق.
- ما بنبيع بياناتك لحدا، وما بنشاركها مع معلنين.
4. ليش بنستعملها
بس لنشغّل التطبيق إلك ولشريكك: نوصّل الأجوبة والرسائل بينكم، ونبعت التذكيرات بالوقت اللي اخترته، ونحسب يومكم وسلسلتكم على توقيتكم، ونحمي الحسابات. ما بنستعمل محتواكم لإعلانات، ولا لتدريب أي ذكاء اصطناعي.
5. مين بيشوف شو
- شريكك: بيشوف اسمك وجنسك، واللي بتشاركه معه جوا التطبيق. جوابك على أي سؤال ما بيوصله إلا بعد ما الاثنين تجاوبوا، والسيرفر هو اللي بيقرر هالشي، مش التطبيق.
- فريق وِصال: لوحة التحكم تبعنا ما بتقدر تقرأ أجوبتكم ولا دفتركم ولا رسايلكم لبعض ولا صوركم ولا وِردكم ولا قسم Hot. هاد مفروض بقاعدة البيانات نفسها، مش وعد بس. اللي بيبيّن للفريق: أرقام عامة (متل عدد الأزواج، أو كم زوجين علّموا بطاقة من Hot «مش إلنا»، وما بيبيّن الرقم إذا أقل من 5 أزواج، ولا مين هم)، وقائمة بالأزواج فيها الأسماء والبلد والمرحلة وتواريخ التسجيل وآخر نشاط، عشان الدعم الفني ومسح الحسابات إذا انطلب. وكمان الرسايل اللي بتبعتها إلنا من "تواصل معنا"، مع اسمك وإيميلك وبلدك، عشان نرد عليك.
- شريكك والاشتراك: إذا اشتركت، وِصال+ بتفتح إلك ولشريكك الاثنين. شريكك بيعرف إنه وِصال+ شغّالة، وبيعرف إنك إنت اللي اشتركت (بيوصله إشعار، وبتظهر بشاشة الاشتراك عنده). بيشوف إنك مشترك ومن أي متجر (App Store أو Google Play)، وتاريخ انتهاء الاشتراك، أو إنها تجربة أو هدية. ما بيشوف المبلغ ولا بيانات بطاقتك أو طريقة دفعك.
- فريق وِصال والاشتراكات: بنشوف أرقام بس (كم زوجين مشتركين، موزعين على المنتج والبلد)، ومش مين اشترك.
- أي حدا معه رابط دعوتك: بيشوف اسمك ورمز الدعوة بس.
- الويدجتس على شاشة تلفونك: إذا ضفتها، ممكن تبيّن مود شريكك أو رسالته أو لقطته أو المسافة لأي حدا بيشوف شاشة تلفونك. ما بتبيّن أسئلة ولا أجوبة أبداً.
6. مين بيساعدنا (أطراف تانية)
| مين | ليش | شو بيوصله |
|---|---|---|
| Hetzner (فنلندا، الاتحاد الأوروبي) | السيرفر وقاعدة البيانات والصور | كل بيانات التطبيق، مخزّنة على سيرفراتهم |
| Google (Firebase Cloud Messaging) وApple (APNs) | توصيل الإشعارات | رمز جهازك ونص الإشعار. نص الإشعار ممكن يكون فيه اسم شريكك، والرسالة السريعة اللي بعتها، أو سؤال اليوم. ما في أجوبة بالإشعارات أبداً، ولا إشي من قسم Hot |
| Apple وGoogle | تسجيل الدخول، إذا اخترته | بنتأكد منهم إنه الدخول صحيح، وبياخدوا منك الموافقة على مشاركة الإيميل والاسم |
| Apple وGoogle (المتجر) | قبض الاشتراك والتأكد منه | بنرسل لهم رقم الشراء عشان نتأكد منه، وبيرسلوا لنا إشعارات عن حالته (تجديد، إلغاء، استرجاع). وقت الشراء بيعطي التطبيق المتجر الرقم الداخلي لحسابك (المذكور فوق). وما بنستلم منهم بياناتك البنكية |
| Resend | إيميل رمز تغيير كلمة السر | إيميلك والرمز |
| Google Play | لما تنزّل التطبيق من رابط دعوة | رمز الدعوة، عشان ينضم شريكك تلقائياً |
كل واحد منهم بيستعمل البيانات بس للخدمة اللي بيقدمها إلنا.
7. قديش بنحتفظ فيها
- اللقطات: بتنمسح لحالها بعد 24 ساعة.
- الموقع: لحد ما تطفي "المسافة" أو تمسح حسابك.
- رموز تغيير كلمة السر: بتنتهي بعد 10 دقايق.
- الصور الممسوحة: بتنمسح من السيرفر خلال دقايق من مسحها.
- سجل إشعارات المتجر (Apple وGoogle): بيتمسح بعد 90 يوم.
- الأيام اللي استعملت فيها التطبيق: 13 شهر.
- باقي البيانات: طول ما حسابك موجود.
- النسخ الاحتياطية: بناخد نسخ مشفّرة عشان ما تضيع بياناتكم إذا صار عطل. أي إشي بتمسحه بيضل فيها لحد 4 أسابيع بالكتير، وبعدها بينمسح لحاله.
8. مسح بياناتك
من الإعدادات ← امسح كل بياناتي، بتقدر تمسح كل إشي بأي وقت:
- حسابك ينمسح، ومعه كل المحتوى المشترك بينك وبين شريكك (الأجوبة والدفتر والقصة والصور والوِرد وقسم Hot)، حتى اللي كتبه شريكك، لأنه محتوى مشترك. ورسايلك إلنا من "تواصل معنا" بتنمسح كمان.
- بيانات اشتراكك عنا (رقم الشراء والمنتج والتواريخ) بتنمسح معه، ومعها سجل إشعارات المتجر المرتبط فيه. السجل اللي ما قدرنا نربطه بحساب بيتمسح لحاله بعد 90 يوم.
- مسح الحساب ما بيلغي اشتراك المتجر. الاشتراك عند Apple أو Google، وبتلغيه من إعدادات المتجر. وإذا ما لغيته بيضل بيتجدد وبيتقاضى منك.
- حساب شريكك بيضل، بس بيرجع بدون شريك.
- البيانات الممسوحة بتضل بالنسخ الاحتياطية لحد 4 أسابيع، وبعدها بتروح.
إذا ما بتقدر تدخل على حسابك، راسلنا على support@getwessal.com وبنمسحه.
9. حقوقك
بتقدر تطلب نسخة من بياناتك، أو تصحيحها، أو مسحها، أو تعترض على أي استعمال إلها، براسلتنا على support@getwessal.com. بنرد خلال 30 يوم.
10. الأمان
الاتصال بين التطبيق والسيرفر مشفّر دايماً (HTTPS). كلمات السر محفوظة كبصمات مشفّرة. الوصول للسيرفر محصور بالفريق، ولوحة التحكم ما إلها صلاحية على محتواكم. وبرضه، ما في نظام آمن 100%، وإذا صار تسريب بيمسّكم بنبلغكم.
11. العمر
وِصال للمتزوجين والمخطوبين والمرتبطين بنيّة الزواج، وعمرك لازم يكون 18 سنة أو أكتر. ما بنجمع بيانات أطفال عن قصد، وإذا عرفنا إنه في حساب لحدا أصغر بنمسحه.
12. التغييرات
إذا غيّرنا هالسياسة بشي مهم، بنبلغكم جوا التطبيق قبل ما يمشي التغيير. التاريخ فوق بيتغيّر مع كل تحديث.